Жигьил шагьрин культура

Дагъустандин Огни шагьур Урусатдиъ варитIан жигьил шагьрарикан саб ву. Душваъ жюрбежюр миллетарин 30 агъзуртIан артухъ вакилар яшамиш шула. «Дагъустандин Огни шагьур» округдин администрацияйи агьалйириз культура жигьатнаан ужудар шараитар ярамиш апIбаз, думу жанлу апIбаз, культурайин дараматарин материалинна техникайин бина мюгькам апIбаз фикир тувра. 

Шагьрин округдиъ культурайин дарамат, шагьрин музей, искусствойин кьюб мектеб, Республикайин циркнан искусствойин мектеб, бицIидарин яратмишарин хал ерлешмиш шула ва дурар агьалйирин гъуллугънаъ а.

2014-пи йис культурайин Йисси мялум дапIнайи. Думу тарихдиз гъубшну. Диди бязидарин юкIвар шад гъапIну, бязидарик гьевес капIну. РД-йин Главайин культурайин гьякьнаан вуйи важиблу месэлйир уьмриз кечирмиш апIури, дурарин бинайиинди культурайин Йисан жюрбежюр серенжемар гъахбан план дюзмиш гъапIнийча. Ккудушу йисаритIан гьаму культурайин Йисан мушваъ культурайин серенжемар кьюб ражари артухъ духна:

КВН, дидин натижйир йивуб, 8-пи мартдиз тялукь «Дада – саб кIуру гаф» темайиан литературайинна музыкайин вечер, культурайин гъуллугъчйирин Йигъаз тялукь концерт, шагьрин майдандиин дишагьлийирин Йигъаз концерт, «БицIидариз аьлхъюб тешкил апIин» рягьимлувалин акция, Дагъ.Огни шагьриъ «Культурайин Йис» ачмиш апIбан машквран концерт, 9-пи майдиъ Ватандин Аьхю дявдин Гъалибвалин Йигъаз тялукь концерт, шагьрин майдандиин бицIидар уьрхру Йигъаз тялукь концерт, Дагъустандиин террористар алархьхъан мина 15 йис тамам хьпахъди аьлакьалу вуди «Учу террориз аькси вуча», «Дагъустандин девлет – дидин сабвал ву» (гьаму сиягь хъана ярхи апIуз шулу) серенжемари агьалйирин юкIвар шад ва ачухъ гъапIну.
Дагъ.Огни шагьрин культурайин Дараматдин гъуллугъчйир Мягьячгъалайиъ гъуху культурайихъди аьлакьалу серенжемариъ, Дербентдин 2000 йисан юбилейиз бахш дапIнайи фестивалиъ, Хючна гъулаъ гъубху рягьимлувалин акцияйиъ, Дахадаевский райондиъ гъубху республикайин зурначйирин кьюбпи фестивалиъ, Къарабудагъкентдиъ гъабхьи «Абйирин аьдатар» милли мяълийирин республикайин 7-пи фестивалиъ ва жара гьядисйириз бахш дапIнайи серенжемариъ жанлуди иштирак гъахьну. Ккудубшу йисан РД-йин культурайин Министерствойи тешкил гъапIу, «Клубдин жюрейин муниципалин ужуб гъурулуш» темайиан Мягьячгъалайиъ гъуху республикайин улупбариъ Дагъ.Огни шагьрин «Дворец культуры» МБУ шубубпи дережайин Дипломдиз лайикьлу гъабхьну. 2012-пи йисанра РД-йин культурайин Министерствойи гьамциб диплом тувунчуз. Дагъустан Республикайин дережайиъ гьамциб кьимат гъазанмиш апIувал – аьхю хъуркьувал ву.

Дагъустандин Огни шагьриъ культура артмиш апIбан жара жюрейин ляхнарра гъахура: кючйир яркьу апIура, гравий ккабхьра, рякъяриин асфальт улубзура, чрушин алапIура, бордюрар, тротуарар къайдайиз хура. Гьаму ляхнар мяишатдин ляхнарин жергейиъ айидар вушра, культурайин дараматдин кIулиъ айидарихъди сигъ аьлакьа ади ляхин гъабхура.

Дагъ. Огни шагьрин шюшдин заводдин культурайин Дараматди гьамусра Огнийин агьалйир рюгьламиш апIура. Дидин чIатан тереф, кабинетар рас дарапIри хайлин йисар вуйи. Аьхирки, культурайин Йис багьна вуди, РД-йин культурайин Министерствойин ва «Дагъустандин Огни шагьур» округдин администрацияйин тIалабниинди, федералин бюджетдиан пул жара гъапIну. Культура жигьатнаан гьял апIуз ккимбу гизаф месэлйирикан саб вуди, культурайин Дарамат рас апIувал давам дапIна. Душваъ улихьна 288 касдиз деъру йишвар айиш, гьамус зал рас ва аьхю дапIна, 320 касдиз деъру йишвар духьна. Ляхнин, гъуллугънан кабинетар гьаму йисан рас апIбанди ву. Фойе, шубуб мертебайиз умбрар рас дапIну ккудукIна. Устйир дараматдин маш улихьнан къайдайиз хуб’ин машгъул ву. Федералин бюджетдиан тувнайи 12,6 миллион манатдин ляхнар ери ади тамам апIура.

Мидланна савайи, культура улихьна гъабхбаз диш дапIнайи сабсана месэла гьял апIбанди ву. Культурайихъди сабси, жигьилариз эдебнан ва ватанпервервалин тербия тувбан ляхинра гъабхура. Думу метлебназ аьдати культурайин Центр (36х28) тикмиш апIуз мясляаьт дапIна. Душваъ библиотекйир, музей, жигьиларихъди ляхин апIру отдел, ветеранарин тешкилат ва выставкайин зал ерлешмиш апIиди.

2013-пи йисан лихури гъахьи культурайин 63 гъуллугъчийикан 2014-пи йисан лихури имбудар ва гьамусяаьтна лихурайидар 27 кас ву. Кьялан гьисабниинди, дурарин вазлин маважиб 9 агъзур манат ву. Хореографияйин отделение кIуруб амдар. Лазим вуйи жара отделенйир ачмиш апIуз мумкинвалра адар. Гьял апIуз ккимбу месэлйирра кIваина хури, гьарганси, гьаму йисанра ич коллективди заан хъуркьувалар гъадагъур, шагьрин культурайин макан гьарди чан халси гьисаб апIур, кIури, умуд кивраза.

http://zoritabasarana.ru