Гудилиз мархь ккунди а

Гъубшу гьяфтайиъ Табасаран райондин Гуми гъулаъ аьдатнан дару серенжем кIули гъубшну. Душваъ ихь абйирин гъи ухьуз кIваълан дубшнайи аьдатарикан саб – мархьлиз дих апIру аьдат – улупну. Думу серенжем Урусатдин халкьарин аьдати культурйирин центрарин серенжемарин республикайин пландин дахилнаъди кIули гъубхну. Кюгьне аьдат Табасаран райондин администрацияйин культурайин, спортдин, туризмдин ва жигьиларин политикайин отдели ва Гуми ва Халагъ гъуларин поселенйирин администрацйири тешкил гъапIну. Думу серенжемдиъ культурайин идарйирин гъуллугъчйир ва гъуларин агьалйир иштирак гъахьну.

Серенжемдин эвелиъ му кюгьне аьдат арайиз гъюваликан гъапнийи. Ихь гъулариъ агьалйир дегьзаманйирихъанмина чпи гьясил гъапIу ипIру-убхъру сурсатариинди дуланмиш шули гъахьну. Хъа хьад къуруб гъабхьиш, дурзнайи мягьсулар ургувалин къурху шуйи. Мягьсулар дархьиган, гаш абхъуйи. Ва гьадму вахтари мархьлиз дих апIбан аьдатра арайиз гъафну.

Мархьлиз дих апIбан серенжемдиъ асас игит Гудил ву. Гуми кIули гъубшу серенжемдиъ Гудилин роль Кюрягъ гъулан культурайин Хулан директор Ризван Гьяжикеримовди уйнамиш гъапIну. Чаз хас вуйиси алахьну, улихьди Гудил, кьяляхъди баяр-шубар ва серенжемдин иштиракчйир, мархьлиз дих апIбан мяълийир апIури, гъулан агьалйирин гьяятариз гъягъюри гъахьну. Серенжемдин иштиракчйирин кьяляхъди халкьдин мукьмар йивру алатариин уйнамиш апIурайидарра гъягъюрайи. Аьдат вуйиси, Гудилиин, гьарсаб гьяятдиз гъушиган, хулан кейванийи шид улубзури ва серенжемдин иштиракчйириз садакьа вуди меълишнар ва жара ипIру-убхърударикан (муртйир, йимишар, хифар ва жарадар) туври гъахьну.

Мархьлиз дих апIбан аьдат улупбан серенжем вари иштиракчйириз кьабул гъабхьну. Аьхириъ райондин администрацияйин культурайин, спортдин, туризмдин ва жигьиларин политикайин отделин начальник Мягьямед Уьсмановди серенжемдин иштиракчйириз аьхю абйирин ирснахьна гьюрматлуди янашмиш хьпаз чухсагъул мялум гъапIну. Дугъу гьацира ихь халкьдин гъи кIваълан гъягъюрайи гизаф жара маракьлу аьдатарра айиваликан ва багахь вахтари Урусатдин халкьарин аьдати культурайин центарарин кюмекниинди дурар улупуз ккайиваликан хабар тувну.

Шиклиъ: Гуми гъулаъ уйнамиш гъапIу мархьлиз дих апIбан серенжемдин иштиракчйир.

http://zoritabasarana.ru